gravacion

Aquí seguimos, con trámites e cousas, isto é un non parar... A semana pasada rematamos por fin as mesturas, dous días a tope con Pablo no estudio para pulir todo aquilo que non nos convencía, escoitando, rescoitando, escoitando no coche, escoitando no portatil... intentando buscar algunha referencia que parecera real, xa que normalmente no estudio sempre soa ben, moi ben. Pero finalmente chega un punto no que hai que parar de darlle voltas ó asunto e ser máis resolutivos, porque poderíamos tirarnos tempo e tempo ata que cada tema fose perfecto. Pero ben, finalmente, hoxe mesmo partiron os temas cara o estudio de Mastering para dar o acabado final... do cal vos falaremos na próxima entrega, cando volten os temas da longa viaxe que lles agarda.
Esta semana pasada, a maiores, tamén estivemos polos estudio Bonham de A Coruña, onde gravamos unha intro para o disco acompañados polo teclista Nacho Goris que podedes ver actualmente en Soultrack. Apetecíanos facer algo diferente, un prólogo para o noso particular "Ensaio sobre o silencio", e contar con Nacho no Piano creemos finalmente que foi unha decisión máis que acertada.

Xa fai unha semana que rematamos todo o traballo do estudio, pero a pesar das datas de festa que corren... e do cambio de ano (por certo, feliz 2012 de parte de Machina), continuamos co traballo que vai parello ó disco. De momento, Machina sempre traballou baixo a autoedición, e a veces gústanos levala ata límites como foi o de construirnos a nosa propia Serigrafía para facer as Camisolas. Así que estos días andamos a voltas co Deseño do disco e da campaña que este suporá, do cal se encarga tamén un membro da banda que é Martín, o noso cantante.
Andamos tamén preparando todo o tema de promoción que nos mesmos teremos que facer, aínda que esperamos botar mans de amig@s e compañeir@s, programando xira... é decir que non só nos vimos para tomarlle unhas copiñas, senón para traballar no que será este novo disco. A parte desto, seguimos con Pablo Iglesias inmerso no estudio mesturando os temas do disco, o cal esperamos deixar listo esta semana para mandar a masterizar o cal vos contaremos na próxima entrega.

Era xa media tarde do mércores cando Gonzalo rematou de gravar a última guitarra, e tocábame a quenda para poñer a parte que restaba do disco, así que decidimos poñernos xa mans á obra. Mentras Pablo preparaba todo para gravar, eu fun tamén mentalizándome,xa que non son dos que me gustan os estudios, non me atopo cómodo e sinto como que teño outra voz que non é a miña e que non sei controlar ó meu antollo, tal e como fago nos directos ou nos ensaios, onde si consigo dominala. Pero ben, tras unhas tomas do primeiro tema… xa me relaxei máis e a cousa foi saindo ben, e como ía ben, tras unha pequena pausa para cear, decidimos continuar gravando ata as 3 da mañán, cando xa o cansancio facía mella, e o último tema dese día costou xa bastante rematalo.

...ou "como soa o Sovtek!!!!"
Antes de baixar a Vigo tocou facerlle visita ao compañeiro Toxo para por a punto as guitarras e, como sempre, non nos defraudou. Saímos de Curtis con guitarras axustadas e quintadas ao ritmo dos primeiros discos de Metallica que Toxo usou e mellorou para darlle o visto bo aos instrumentos. Grazas Toxo!!